Matthew 22

Vaikala Latilovo sou La'ilali sou Taula'i Toxoxa'a

(Luk 14:15-24)

1Iesu musolonu vaivaikala noxou, la muvikalane'i no anu vaikala latilovo la aloxo 'o. 2“Saxisaxila'u noxou Lataua teitexi no opo loxotolo ne, aloxo tatananu tuala vile ulalaxi sou u'oxonu la'ilali sou 'olu utaula'i. 3Anu mupalusi'a ta mitema sou xaixai noxou milai noxi'a ane'i ane anu mu'avali'a sou lexe ine'e no anu la'ilali ne, la ane'i imasaxa sou ine'e uasi. 4La anu mupalusi'a ta mitema sou xaixai se'i la milai la muvikalane'i lexe, ilai ivikalane'i ta mitema e mu'avali'a sou ine'e no anu la'ilali lexe, ‘Ngane'e xo la'ilali sou taula'i a eni elalaxiinu mukalu. Kau tongolixu mo ta mimii ta tongotongolixa'a mi'ele'elexa'a mukalu, xe la'ilali iouiou ne muxutu mukalu. La sou ngingi ngane'e mo nga'ani.’ 5Ia ane'i milomu uasi la milai no anu xaixaii'a vilevilesi. Vile mulai no xaixu, xe vile mulai no taasou la iloto noxou. 6 ^aIa ane'i se'i ne miavuti la mitetelisi'a ta mitema sou xaixai ne ka mive'ave'a misoisoli. 7La tatananu tuala la'iaxu misevile la mupalusi'a ta mitema sou 'oto'oto noxou milai mive'ave'a ta mitema ne misoisoli mukalusi xe mielaxu tualasi'a. 8Xe muavuti la muvikalane'i ta mitema sou xaixai noxou lexe, ‘la'ilali sou taula'i mulalaxii mukalu, la ta mitema e eni e'avali'a lexe ine'e no anu la'ilali 'o ne ta mitema ta laixe sou ine'e uasi. 9La sou ngalai no ioxuioxu votevote'i xe ngaxalisou 'ena'ei ne, la nga'avalou une'e.’ 10Xe ta mitema sou xaixai ne milai la mi'avali'a ta mitema ta'ei e ane'i mixalisi'a no vote'i ne mine'e, se'i ta mitema ta lailaixe xe se'i ta mitema ta masumasua. Xe mine'e mipita no anu tani sou taula'i ne la mu'ana'ana manina. 11Ia no mine tatananu tuala mu'una sou iou mumaisi'a la mumaisou vile no taine'i ne utaanu tokolomo sou taula'i uasi. 12Xe tatananu tuala muavuti la mutali'isou lexe, ‘Ae menexilo, nini nenava la nataanu tokolomo sou taula'i laixe ka sou na'una 'o ua?’ La anu ukolinu uasi. 13 ^bLa sou tatananu tuala muvikalane'i ta mitema sou xaixai noxou lexe, ‘Ngatetelisou mo ngasakisakiinu avolu ilou tava'u mo ngalea ulai no ale no isivoxo no tuala sou itatama xe anaxa'a ukalakikiki.’ 14La Iesu mukalusou vaivaikala noxou aloxo 'o, ta mitema tavu'alo Lataua mu'avali'a, ia anu musosovosi'a ta ta'eisi sou i'unalai.”

Tali'i sou Talea Lamoli Ulai Noxou Kaisari

(Mak 12:13-17; Luk 20:20-26)

15 ^cXe ta Palisaio milai la mikamuli vote'i sou lexe iuauoixu Iesu no anu vaivaikalau. 16La mipalusi'a ta molomolo noxi'a ilo'a ta mitema noxou Elodesi milai noxou Iesu, la mivikalanu aloxo 'o, “Tisa, nexi telavu lexe nini itema vile sou nalemo mii, la navikala maninasou. Mo nini nalavusou na'ume'a ta mitema uasi, xo ane'i ane ualasi'a mo ane'i ane ualasi'a uasi ne, mimomomo vilesisi no ieni. Ia nini nalosie'ixu vote'i laixe noxou Lataua no anu vaikala manina. 17La sou navikalanexi lexe, loxovaa anu lapuloto vile umomomo sou nenge taleanu lamoli ulai noxou Kaisari? Uasi, loxovaa taleanu?” 18Ane'i mitali'isou Iesu aloxo ne la Anu mulavu no anu kalakalavoi noxi'a ne. La muvikalane'i lexe, “Ngingi ngamitema sou kalakalavoi. Tava'u loxovaa ane ngingi nga'oxo lexe ngatovoleli sou ngatetelisilo 'o? 19Ioxe ngano'u Denalia vile une'e mo amaisou.” La ane'i mino'u mulai noxou sou mumaisou. 20Xe muavuti la mutali'isi'a lexe, “'Ei kisou mo ualasou e uxolu no anu lamoli 'o?” 21 ^dLa ane'i mikolinu lexe, “Anu noxou Kaisari.” La sou Anu muvikalane'i lexe, “Mii ma'ia ane noxou Kaisari, la ngalosou Kaisari. Xe mii ma'ia ane noxou Lataua la ngalosou Lataua.” 22No mine ane'i milomusou aloxo ne la ane'i mikuluke manina, la mi'italonu Iesu la milai.

Tali'i Noxi'a ta Sadokaio

23 ^eXe ili'i no voxo ane ne la ta Sadokaio mine'e noxou. Ane'i ta mitema ane ne, ixavutala lexe ta mitema isoli, io ulai ili'i la imauli la uasi. Mine'e mixali noxou Iesu la mitali'isou aloxo 'o, 24 ^f“Tisa, vaikala muai no anu kaukavu noxou Mosesi mune'e noxinge aloxo 'o. Itema vile mutaula'i ia upalane'i ta 'olu uasi xe usoli, la anu laixe lexe vimou u'uluxe sema ne, mo sou upalane'i iu vimou ta 'olu noxie. 25Ioxe, no voxo vile la ta mitema muxatele tamei ixoxolu. Ane'i muxatele tamei ne ane'i ta taumetali. Ilo'a ixoxolu la ane laposalaxu ne mutaula'i, xe ili'i la musoli. Ia upalane'i ta 'olu se'i noxie sema ne uasi, la mu'italone noxou vimou sou u'uluxe. 26Xe vimo'a ane ta tameisi'a ne muavuti la mu'uluxe sema ne, la anu kalumo musoli la, ia upalane'i ta 'olu se'i noxie uasi. Mo vimo'a tatalusi'a ne anu kalumo aloxo ne si. Anu aloxo ne mole, ane'i muxatele tamei mo ne, mi'uluxe sema vilesisi ne, la vile noxi'a upalaa 'olu vile noxie uasi. 27Mole ili'i la ane sema kalumo misoli. 28Ioxe, ulai ili'i no anu voxo ane sou ta mitema ane misoisoli itulu sou imauli, la 'ei noxi'a ane'i muxatele tamei ne semau maninasou xo loxo ane'i muxatele tamei mo ne ane'i mi'uluxe sema vilesisi ne?” 29Xe Iesu muavuti la muvikalane'i aloxo 'o, “Ngingi ngexovulaulau no anu vaikalamengi, xo ngingi ngalavusou vaikala muxolu no anu Lavuku Tavuna mo xavi noxou Lataua uasi. 30Ta mitema ane misoisoli ne lexe imauli la umomomo sou itaula'i la uasi. Ane'i ixali loxo ta angelo teitexi no opo loxotolo. 31Ioxe no anu vaivaikalasi'a ta mitema ane misoisoli ka itulu ne, loxovaa ngingi ngaitisou vaikala ma'ia Lataua muvikalangengixu uasi? 32 ^gAnu muvikala lexe, ‘Eni Lataua noxou Avalaamu mo Lataua noxou Aisaki mo Lataua noxou Iakovo.’ Anu Lataua ne noxi'a ta mitema misoisoli uasi, anu Lataua noxi'a ta mitema ane imauli vaimomo.” 33Xe no mine ane'i milomusou vaivaikala noxou Iesu ne, la mikuluke manina no anu a'alo noxou ne.

Lapuloto Anevaa Ane Muuli no Anu Lapuloto Mukalusi

(Mak 12:28-34; Luk 10:25-28)

34Ta Palisaio mixolu mipita ia milomusou Iesu mine mukolinu tali'i noxi'a ta Sadokaio la vaivaikalau ne mulapusi. 35La sou vile noxi'a ne anu mulavu laixe no anu lapuloto ne u'oxo lexe utovonu Iesu no anu tali'i ne. 36Xe muavuti la mutali'isou aloxo 'o, “Tisa, eni elavu lexe lapuloto noxinge tavu'alo, ia lapuloto anevaa ane muuli manina no anu lapuloto latala ne?” 37 ^hLa Iesu mukolinu aloxo 'o, “‘Ngamasaxau IAUE Lataua noxinge no anu tangengi, mo no anu uleengengi, mo no anu xavutalamengi ukalusi.’ 38Lapuloto ane ne anu muuliuli xe mutila manina no anu lapuloto latala mukalusi. 39 ⁱXe ta tameisou ne anu mutila iou vilesisi aloxo ane tei ne aloxo 'o, ‘Ngamasaxau menexinge vile aloxo ngingi ngemasaxainge la!’ 40 ^jLapuloto noxou Mosesi mo vaivaikala noxi'a ta mitema sou palomatana ne anu tava'u vilesisi ane no anu lapuloto tamei nesi.”

'Ei 'Olu E Kalisito 'o

(Mak 12:35-37; Luk 20:41-44)

41Ioxe no mine ta Palisaio mixolu mipita la Iesu mutali'isi'a aloxo 'o. 42 ^k “Ngingi ngexavutala noxou Kalisito a loxovaa? Mo 'ei 'olu ne?” Xe ane'i miavuti la mikolinu lexe, “Deviti 'olu.” 43La sou Anu muvikalane'i aloxo 'o, “Tava'u loxovaa la sou Uleenu Tavuna mulosou Deviti lavulavu la molu mumoxo'u lexe Tila noxilo? Deviti muvikala aloxo 'o.

44 ^l ‘IAUE muvikalanu Tila noxilo aloxo 'o,
Nava'isa'ileli no avolo tema ulai utalo no anu voxo ane
sou eni amuxaxa'a ta uluameni no tava'ine laaxu.’
45La sou lexe Deviti molu mumoxo'u lexe anu Tila noxou. Ia loxovaa la sou anu Tila ne anu Deviti 'olu la?” 46Ane'i milomu sou aloxo ne la vile ukolinu vaikala noxou uasi. Mo musoko no anu voxo ane ne la itema vile ulai noxou sou utali'isou no anu tali'i vile la uasi.